قومي نشرياتي ادارن جي نيلامي جو نعرو لڳائيندڙن 2014ع ۾ پي ٽي وي ۽ 9 مئي 2023ع تي ريڊيو پاڪستان تي حملو ڪيو: مريم اورنگزيب

اسلام آباد – 12 – جولاءِ (اي پي پي) اطلاعات ۽ نشريا واري وفاقي وزير مريم اورنگزيب چيو آهي ته قومي نشرياتي ادارن جي نيلامي جو نعرو لڳائيندڙن 2014ع ۾ پي ٽي وي ۽ 9 مئي 2023ع تي ريڊيو پاڪستان تي حملو ڪيو، اسان اقتدار ۾ اچي انهن ادارن کي نيلام ڪرڻ جا نعرا نه هنيا پر انهن کي بحال ڪيو، ريڊيو پاڪستان ملڪ جو قيمتي اثاثو آهي، 14 آگسٽ 1947ع تي پاڪستان جي اعلان لاءِ انهي ريڊيو جو ٽرانسميٽر استعمال ٿيو هو، اسان 14 مهينن جي مختصر مدي ۾ ريڊيو پاڪستان ۾ هنگامي بنيادن تي بحالي جو پروگرام شروع ڪيو، اڄ ريڊيو پاڪستان ۾ 12 اسٽوڊيوز جي شروعات ڪئي پئي وڃي، پي ٽي آءِ پاران روزانو چيو ويندو هو ته ملڪ سريلنڪا بڻجي ويندو پر اسان ملڪ کي ڊيفالٽ مان ڪڍي معيشت مستحڪم ڪئي، اسان جي دور ۾ فچ جي ريٽنگ بهتر ٿي، پاڪستان گري لسٽ مان نڪتو، اظهار راءِ جي آزادي ۾ پاڪستان جي درجابندي ۾ 7 درجا بهتري آئي. اهڙن خيالن جو اظهار هن ريڊيو پاڪستان اسلام آباد جي دوري جي موقعي تي پريس ڪانفرنس کي خطاب ڪندي ڪيو. ان موقعي تي اطلاعات وارو وفاقي سيڪريٽري سهيل علي خان ۽ ڊي جي ريڊيو پاڪستان طاهر حسن پڻ ساڻس گڏ موجود هئا. اطلاعات واري وفاقي وزير مريم اورنگزيب چيو ته اسان اقتدار ۾ اچي قومي نشرياتي ادارن جون عمارتون نيلام ڪرڻ جا نعرا نه هنيا، اسان 14 مهينن جي مختصر مدي ۾ ريڊيو پاڪستان ۾ بحالي جو پروگرام شروع ڪيو. هن چيو ته ريڊيو پاڪستان ملڪ جو قيمتي اثاثو آهي، گذريل حڪومت جي دور ۾ ريڊيو پاڪستان جي نيلامي جون ڳالهيون ٿينديون هيون. ان موقعي تي هن پريس ڪانفرنس دوران ريڊيو پاڪستان جو اهو ٽرانسميٽر پڻ ميڊيا کي ڏيکاريو جنهن تان 14 آگسٽ 1947ع تي پاڪستان جي آزادي جو اعلان نشر ٿيو هو. اطلاعات واري وفاقي وير چيو ته جن ماڻهن قومي ادارن کي نيلام ڪرڻ جو نعرو هنيو، انهن 2014ع ۾ پي ٽي وي تي حملو ڪيو ۽ پوءِ 9 مئي 2023ع تي ريڊيو پاڪستان تي حملو ڪيو. هن چيو ته 9 مئي تي ريڊيو پاڪستان، حساس عمارتن تي حملا ۽ شهيدن جي يادگارن جي بي حرمتي ڪئي وئي. وفاقي وزير چيو ته اڄ اسان الحمدالله ريڊيو پاڪستان جي لاءِ هڪ بزنس پلان تيار ڪيو آهي. ريڊيو پاڪستان تان 94 ايف ايم فريڪوئنسي سان 24 ڪلاڪ اسپورٽس جي ٽرانسميشن شروع ڪئي وئي آهي، اهڙي طرح 11 علائقائي زبانن ۾ نشريات جي پڻ شروعات ڪئي وئي آهي. هن چيو ته ريڊيو تان ماحوليات بابت نشريات، آءِ ٽي بابت معلومات جي فراهمي جي لاءِ ٽيڪ نشريات، ڊراما، پروڊڪشن، آڊيو ڊراما ريل جي حوالي سان اسٽوڊيوز، 24 ڪلاڪ نشريات رکندڙ پوڊ ڪاسٽ اسٽوڊيو شروع ڪيا ويا آهن. هن چيو ته اوورسيز پاڪستانيز پاڪستان جي حوالي سان سمورو مواد پوڊ ڪاسٽ جي ورلڊ سروس تان حاصل ڪري سگهن ٿا. اطلاعات واري وفاقي وزير چيو ته ايف ايم 101 جا 25 سال مڪمل ٿي رهيا آهن، ان حوالي سان تقريب جلد منعقد ٿيندي. هن چيو ته ريڊيو پاڪستان ۾ نيوز بليٽن نيشنل جي نالي سان پڻ اسٽوڊيو شروع ڪيو ويو آهي، اهڙي طرح مجموعي طور تي اڄ 12 اسٽوڊيوز جي شروعات ڪئي وئي آهي جيڪي عالمي معيار موجب آهن. اطلاعات واري وفاقي وزير چيو ته صوة القرآن جي ٽرانسميشن کي ڊيجيٽل ڪيو ويو آهي. هن چيو ته اهي سموريون شيون 14 مهينن جي مختصر مدي ۾ مڪمل ٿيون آهن جڏهن ته گذريل چار سال اهڙو اطلاعات وارو وزير هو جيڪو ادارن تي ڌيان ڏيڻ بدران صحافين جي منهن تي چماٽ هڻڻ ۾ مصروف هو. گذريل چار سالن دوران صحافين بدترين سينسرشپ ڏٺي. هن چيو ته الله جي فضل ۽ ڪرم سان 14 مهينن جي مختصر مدي ۾ اسان تمام گهڻيون ڪاميابيون حاصل ڪيون، اسان فلم، ڪلچر ۽ پاڪستان جي ورثي کي فروغ ڏنو. هن چيو ته ريڊيو پاڪستان جي سمورن اسٽوڊيوز کي يونيورسٽين جي لاءِ پڻ اوپن ڪيو ويندو. ريڊيو پاڪستان اهو ئي پليٽ فارم نوجوانن کي به فراهم ڪندو ته جيئن اهي پنهنجي صلاحيتن جو ڀرپور استعمال ڪري سگهن. اطلاعات واري وفاقي وزير چيو ته پي ٽي وي اڪيڊمي، ريڊيو پاڪستان جي اڪيڊمي ۽ انفارميشن سروس اڪيڊمي کي ضم ڪري يونيورسٽين جي شاگردن جي لاءِ پروگرام شروع ڪيو پيو وڃي. مريم اورنگزيب چيو ته پي ٽي آءِ نفرت، ڪوڙ کي پروان چڙهايو ۽ منفي پروپئگنڊه ڪئي، پي ٽي آءِ آءِ ايم ايف سان سخت شرطن تي معاهدو ڪيو، پوءِ ان جي خلاف ورزي ڪئي ۽ ان کي معطل ڪيو ۽ ملڪ کي ڊيفالٽ جي ويجهو ڇڏي هليا ويا ۽ اڄ موصوف فرمائي رهيا آهن ته جيڪڏهن اسان آءِ ايم ايف جي حمايت نه ڪريون ها، ساٿ نه ڏيون ها ته آءِ ايم ايف نه مڃي ها ۽ ملڪ ڊيفالٽ ڪري وڃي ها. هن چيو ته اها انهن جي ذهني ڪيفيت آهي. هن چيو ته هڪ طرف فراڊ ۽ چوري ڪئي وئي جڏهن ته ٻئي طرف اتحادي حڪومت 14 مهينن جي مختصر مدي ۾ ملڪ کي تعمير ڪيو، اڄ 14 مهينن جي ڪارڪردگي جو اندازو ان ڳالهه مان لڳائي سگهجي ٿو ته گڏيل قومن جي انساني حقن واري ڪائونسل پاڪستان ۾ انساني حقن جي صورتحال کي بهتر چيو آهي. فچ پاڪستان جي معيشت کي بهتر چيو آهي. هن چيو ته پي ٽي آءِ پاران روزانو چيو ويندو هو ته ملڪ سريلنڪا بڻجي ويندو پر الله جي فضل ۽ ڪرم سان اسان پاڪستان کي ڊيفالٽ مان ڪڍي معيشت کي مستحڪم ڪيو. هن چيو ته اسان جي دور ۾ فچ جي ريٽنگ بهتر ٿي، پاڪستان گري لسٽ مان نڪتو، اظهار راءِ جي آزادي ۾ پاڪستان جي درجابندي ۾ 7 درجا بهتري آئي. هن سوال ڪيو ته ڪهڙو سبب آهي جو چار سالن تائين ملڪ تي مڙهيل وزيراعظم کي ميڊيا پريڊيٽر چيو ويو؟ ڪهڙو سبب آهي جو هيومن رائيٽس رپورٽ جڏهن سپريم ڪورٽ ۾ پيش ٿيندي هئي ته ان ۾ انساني حقن جي خلاف ورزي نظر ايندي هئي؟ ڪهڙو سبب آهي جو هي پاڪستان جي معيشت کي تباهه ڪري ڊيفالٽ جي ويجهو ڇڏي ويا هئا؟ سبب رڳو اهو هو ته ويزن ۽ مشن مختلف هو. هن چيو ته هاڻي هڪ تعميري ويزن آهي جنهن جا نتيجا اڄ ريڊيو پاڪستان ۽ پاڪستان ٽيليويزن ۾ ڏسڻ لاءِ ملي رهيا آهن. هن چيو ته ريڊيو پاڪستان جا سمورا آرڪائيوز ڊيجيٽل ڪيا پيا وڃن، ان حوالي سان عوام کي تمام جلد خوشخبري ٻڌائينداسين. مريم اورنگزيب چيو ته پاڪستان معاشي ترقي جي راهه تي گامزن آهي، پاڪستان جي اندر عوام کي روزگار جي فراهمي ۽ مهانگائي ۾ گهٽتائي سميت سمورا معاشي اشارا بهتر ڪرڻ جو مشن جاري آهي، اسان مشڪل فيصلا ڪيا پر عوام به حڪومت تي اعتماد ڪيو ۽ صبر کان ڪم ورتو جنهن تي عوام کي خراج تحسين پيش ڪريان ٿي. وفاقي وزير چيو ته اتحادي حڪومت سياسي بصيرت سان ملڪ کي مشڪلاتن مان ڪڍيو ۽ سدائين وانگر ٻيهر ترقي جي راهه تي گامزن ڪيو. صحافين جي سوالن جا جواب ڏيندي اطلاعات واري وفاقي وزير چيو ته اڄ پوري دنيا ۾ براڊ ڪاسٽنگ جو منظرنامو بدلجي رهيو آهي، اڄ جيڪي قدم کنيا ويا آهن اهي انهي جي ڪڙيءَ آهن ته ڪهڙي طرح انهن اسٽوڊيوز کي مونٽائز ڪيو وڃي ۽ انهن کي ڪيئن مالي لحاظ کان بهتر ڪيو وڃي. هن چيو ته ريڊيو پاڪستان وٽ جيڪا سهولت موجود آهي اها ملڪ جي ڪنهن ٻئي نشرياتي اداري وٽ نه آهي، ان سهولت سان ريڊيو پاڪستان مالي فائدو حاصل ڪري سگهي ٿو. هڪ سوال تي اطلاعات واري وفاقي وزير چيو ته پي ٽي وي جي 35 رپيا لائيسنس فيس وانگر ريڊيو پاڪستان جي لاءِ به فيس جو تعين ڪيو ويو آهي جنهن سان ريڊيو پاڪستان سٺو روينيو حاصل ڪري سگهي ٿو. هڪ ٻئي سوال تي هن چيو ته ريڊيو پاڪستان جو بهترين ڊيجيٽل پليٽ فارم آهي. ريڊيو پاڪستان پنهنجي وسيلن سان آءِ ٽي ڊپارٽمينٽ کي به ڊيجيٽل ڪيو آهي جڏهن ته اڄ جيترا اسٽوڊيوز ٺاهيا ويا آهن اهي ريڊيو پاڪستان فائونيشن ٺاهيا آهن. اطلاعات واري وفاقي وزير چيو ته 1947ع کانپوءِ پهريون ڀيرو ڊيجيٽل ڊي آر ايم هزار ڪلوواٽ جا چار بلين رپيا ماليت جا ٽرانسميٽ پراجيڪٽ حڪومت پي ايس ڊي پي ۾ منظور ڪيو آهي. اهو منصوبو روات ۾ شروع ڪيو پيو وڃي جنهن جو جلد پيڙهه جو پٿر رکيو ويندو. هن چيو ته ان ٽرانسميٽر جي ذريعي 40 ملڪن تائين ريڊيو جا سگنلز پهچندا.